Posted on

DOLCE CALABRIA

Mpunta all’Italia, cumu nu spiruni

Di nu stivale, chjinu de limuni;

Chjinu d’alivi, aranci e mandarini;

Di faggi, di castagni e gersumini.

E’ sta Calabria bella e allittirata

Chjina d’eroi, sempre lluminata;

Filosufi, poeti e prufissuri;

Sta terra è siminata, chjin’e jiuri.

Ccà ccè lu mari azzurru e cristallinu

Dà Sila u dè luntanu, è assai vicinu ;

Pochi minuti, fra muntagna e mari ,

Ognunu vene ccà, ppe sse scialari.

Scindànu pè truvare u paradisu ,

Stu suli ardenti, assiemi a nnu surrisu ;

Nu piezzu e cielu limpidu, pulitu ;

A rèsina c’ardura, dell’abìtu.

Cilea lu musicista, e Campanella

Filosufu, di sta Calabria bella ;

Corrdo Alvaro, pinna paisana

Ntrò strittu e Scilla la fata Murgana.

I Golfi e Santafemia e de Squillaci

Su terra di ristoru e tanta paci ,

Mentri a Rivera Ionia e ddu Tirrenu

Fau godè u paradisu supr’u trenu.

De Praia a Mare fino a Capo D’Armi

Dui mari azzurri, paranu gendarmi

Chi s’azanu putenti e maestusi ,

Ppe cchissu i Piemontesi su gelusi.

Veniti ccà, pecchì nun cè gramigna ,

Ccà cce parmentu e mustu ,cu lla vigna ;

Provatilu stu vinu jancu e russu ,

Pue v’abbiditi, e nnu storciti u mussu.

Trovati tanta luci e assai culuri ,

Gente c’accoglie cumu gran Signori ;

Trovati aria pura e assai bellizza

Nu cori che v’abbrazza cu dulcizza.


Giuseppe Verduci



<

Print Friendly, PDF & Email